بالدارجي

بالدارجي 

أخر الليل ..

♦️عشان نبقى واضحين ..

قلم ثائر :- نشوة أحمد الطيب 

الرجاء حفظ الأدوية بعيداً عن متناول الأطفال ..

- الثورة موجودة في قلوب الثوار فقط، وحكومة الثورة مجرد قصة تُحكى للأطفال ما قبل النوم .

- حمدوك قلبوا على البلد بس الناشطين المعاهو ما عندهم علاقة بحكم دولة، بالكتير عليهم ادارة مؤسسات .

- ليه بنقول ناشطين ! ببساطة عشان لسه بتناقرو فيما بعضهم عبر الوسائط ، شغل ( مشاط و مكاواة و  فِليع دُراب)

-إعلام الوزارات زي ونسة الجبنة حقت الحلة (نجر وشتل) 

وتعلمنا في عهد حرية الاعلام سياسة اسمها ( كدي شوف لي الشعب ده بيوافق ؟) ما وافق طوالي بيحذفو الخبر او البيان من منصتهم الاعلامية 

- الوزير يصرح وينكر 

- اعلام الوزير يكتب ويمسح 

- الوزيرة تكتب وتصرح وتنفي بحديث مُبهم  عبر حسابها الشخصي في حين انو في مكتب اسمو مكتب اعلام وعلاقات عامة لتجنب اللبس 

- التعينات الإدارية  بالتمني

 " يااااه نفسي ابقى مديرة " ، رد الناشطين " شبيك لبيك الإدارة بين اديك ونحنا محتاجين ليك" 

- بيحفرو لبعض ، طيب دايرين تشيلوا اكرم شيلو معاهو مدني لأنو اكعب منو شديد و ٦ و ٧ واحد 

♦️المكون العسكري 

اما ديل ناقشين القصة وعارفين اللعبة كويس ، الورق الرابح كلو في يدوهم + الجوكر 

♦️الكيزان 

بصلة عفنة .. تربية شياطين والموضوع واقع ليهم ، بيلعبوا على الوتر الحساس ، العنصرية ، القبلية ، الجهوية ،، الدامه والشايب والولد .

- الفتنة موجودة من زمان من زمن زراعتهم للتفرقة في نفس الشعب السوداني ، ده اسود و ده ابيض ، جاز وبنزين وحالياً بيشخطو في الكبريت والنار محل ولعت انتو عارفنها .

- بتحكحكو وبتلصقو في القائد الجديد المسيطر " حميدتي" وجداد الكيزان اصبح جداد الدعم السريع ، ما تؤاخذوهم في النهاية عبدة مصالح كلهم ،و  (محل الجيفة الكلاب بتتلم ).

- نرجع للمكون العسكري 

- الحكومة المدنية في نظرهم (شُفع) وادوهم الحكم يلعبوا بيهو حبه يا صابت يا خابت 

  

♦️الشعب يا مسكين الراقد في السكين بلدنا وضعوا حزين و رُحنا  في ستين 

وبعد كل الشفناهو في فترة العام الكامل ده بقينا نوصي بحفظ الأدوية بعيداً عن متناول الأطفال ..